ത്രസിപ്പിക്കുന്ന ത്രില്ലർ, കയ്യടി നേടി 'കൊറോണ പേപ്പേഴ്‌സ്' - Malayale.ca

https://chat.whatsapp.com/FDyHrouQqfAC7xTtsrkFWp

ക്രൈം, സസ്പെൻസ് ത്രില്ലർ, നല്ല സ്ക്രിപ്റ്റും പ്രകടനങ്ങളുമായി ഒരു നിമിഷം പോലും ലാഗ് അടിപ്പിക്കാതെ മുന്നോട്ടുപോകുന്ന പ്രിയദർശൻ – ഷെയ്ൻ നിഗം ചിത്രം ‘കൊറോണ പേപ്പേഴ്സ്’ കാനഡയിൽ ടൂ കേരള എന്റർടൈൻമെന്റ് ബാനറിൽ ബിജു തയ്യിൽച്ചിറയാണ് പ്രദർശനത്തിനെത്തിച്ചിരിക്കുന്നത്.

എസ്‌ഐ ആയി ടൗൺ സ്റ്റേഷനിൽ ജോലിക്കു ചേരാനെത്തുന്ന ഷെയിൻ നിഗത്തിന്റെ കഥാപാത്രത്തിന്റെ കയ്യിൽ നിന്നും സർവീസ് റിവോൾവർ പോക്കറ്റടിക്കപ്പെടുന്നതും തുടർന്ന് നഗരത്തിൽ നടക്കുന്ന കുറ്റകൃത്യത്തിലൂടെയാണ് കഥ മുന്നോട്ടുനീങ്ങുന്നത്. ആദ്യാവസാനം കാണികളെ പിടിച്ചിരുത്തുന്ന ത്രില്ലർ സിനിമയാണ് കൊറോണ പേപ്പേഴ്സ്. അങ്ങേയറ്റം ത്രില്ല് അടിപ്പിച്ച് സസ്പെൻസും നിറച്ച് അതിഗംഭീര തിരക്കഥയിലാണ് ചിത്രം ഒരുക്കിയിരിക്കുന്നത്. ഒപ്പത്തിന് ശേഷം ത്രില്ലിങ്ങ് സ്വഭാവമുള്ള പ്രിയദർശന്റെ ചിത്രം കൂടിയാണ് കൊറോണ പേപ്പേഴ്‌സ്.

താരനിര കൊണ്ട് സമ്പന്നമാണ് എന്നത് പോലെ തന്നെ അഭിനയ പ്രകടനങ്ങളും എടുത്ത് പറയേണ്ടതാണ്. സിദ്ദിഖിന്റെ ഇതുവരെ കാണാത്ത രീതിയിലുള്ള പ്രകടനം കയ്യടി അർഹിക്കുന്നുണ്ട്. ആദ്യ പകുതിയിലും രണ്ടാം പകുതിയിലും തന്റെ വേഷം ഭംഗിയായി പ്രേക്ഷകർക്ക് മുന്നിലെത്തിക്കാൻ ഷെയ്ൻ നിഗമിന് സാധിച്ചു. ഷെയ്നിന് ഇതൊരു തിരിച്ചുവരവ് ചിത്രമായി രേഖപ്പെടുത്താം. കൂടാതെ അതിഥി വേഷങ്ങളിൽ മലയാളത്തിന്റെ ഇഷ്‌ടമുഖം വന്നു പോകുന്നതും സിനിമയുടെ മുതൽക്കൂട്ടാണ്. അനായാസ പ്രകടനം കൊണ്ട് ഷൈൻ ടോം ചാക്കോ, ജീൻ പോൾ ലാൽ, ഗായത്രി ശങ്കർ തുടങ്ങിയവരും മികച്ച അഭിനയം കാഴ്ചവെച്ചിട്ടുണ്ട്.

പ്രിയദർശൻ തന്നെ തിരക്കഥ എഴുതി സംവിധാനം ചെയ്യുന്ന ചിത്രത്തിന് കഥ എഴുതിയിരിക്കുന്നത് ശ്രീ ഗണേഷാണ്. ഫോർ ഫ്രെയിംസിന്റെ ആദ്യ നിർമാണ സംരഭമായ ഈ ചിത്രം പ്രിയദർശൻ തന്നെയാണ് നിർമ്മിക്കുന്നത്. എൻ.എം ബാദുഷയാണ് ചിത്രത്തിന്റെ എക്‌സിക്യൂട്ടീവ് പ്രൊഡ്യൂസർ. ദിവാകർ എസ് മണി ഛായാഗ്രാഹണം നിർവഹിക്കുന്ന ചിത്രത്തിന്റെ എഡിറ്റിങ് എം.എസ് അയ്യപ്പൻ നായർ ആണ് നിർവഹിക്കുന്നത്. സംഗീതം -കെ. പി, പ്രൊഡക്ഷൻ കോർഡിനേറ്റർ -ഷാനവാസ് ഷാജഹാൻ.