വീടിന് തീപിടിച്ച് മൂന്ന് കുട്ടികളടക്കം അഞ്ച് പേർ ബ്രാംപ്ടണിൽ വെന്തു മരിച്ചു.

https://chat.whatsapp.com/IohETtskZ8IHQxOy5Wdjqa

തിങ്കളാഴ്ച പുലർച്ചെ ബ്രാംപ്ടണിൽ വീടിന് തീപിടിച്ച് മൂന്ന് കുട്ടികൾ ഉൾപ്പെടെ കുടുംബത്തിലെ അഞ്ച് പേർ മരിച്ചതായി പീൽ റീജിയണൽ പോലീസ് അറിയിച്ചു. പുലർച്ചെ 2 മണിക്ക് ശേഷം സാൻഡൽവുഡ് പാർക്ക്‌വേയ്ക്കും കെന്നഡി റോഡിനും സമീപമുള്ള കോൺസ്റ്റോഗ ഡ്രൈവിലുള്ള വീട്ടിലാണ് ദാരുണമായാ സംഭവം ഉണ്ടായത്.

രണ്ട് കുട്ടികളെ ആശുപത്രിയിൽ എത്തിച്ച ശേഷവും ഒരു കുട്ടിയും മാതാപിതാക്കളും വീട്ടിൽ മരിച്ച നിലയിൽ കണ്ടെത്തുകയും ചെയ്‌തെന്ന് പീൽ പോലീസ് പറഞ്ഞു. റേവൻ, ഭർത്താവ് നസീർ, അവരുടെ മൂന്ന് മക്കളായ ലൈല, ജെയ്‌ഡൻ, ആലിയ എന്നിവരാണ് മരിച്ചതെന്ന് ബ്രാംപ്ടൺ ഫയർ ചീഫ് ബിൽ ബോയ്സ് പറഞ്ഞു. ആറ് വയസിനും പതിനൊന്ന് വയസിനുമിടയിലാണ് മൂന്ന് കുട്ടികളുടെയും പ്രായമെന്ന് കരുതുന്നതായും അദ്ദേഹം പറഞ്ഞു.

ഗുരുതരമായ പരിക്കേറ്റ ഒരു മുതിർന്നയാളെ ട്രോമ സെന്ററിൽ പ്രവേശിപ്പിച്ചതായി പോലീസ് പറഞ്ഞു. ആശുപത്രിയിൽ ചികിത്സയിലുള്ള മുതിർന്ന വ്യക്തിയും കുടുംബവും തമ്മിലുള്ള ബന്ധം അന്വേഷിക്കുകയാണെന്നും പോലീസ് അറിയിച്ചു.

വീട്ടിലുണ്ടായിരുന്ന മറ്റ് രണ്ട് മുതിർന്നവർക്കും ശാരീരിക പരിക്കുകളൊന്നും കൂടാതെ വീട്ടിൽ നിന്ന് രക്ഷപ്പെടാൻ കഴിഞ്ഞു. ഇരുവരും ബേസ്‌മെന്റിൽ നിന്ന് രക്ഷപ്പെട്ടതായി കരുതുന്നതായി ബ്രാംപ്ടൺ ഫയർ ചീഫ് ബിൽ ബോയ്സ് പറഞ്ഞു. അഗ്നിശമന സേനാംഗങ്ങൾ സ്ഥലത്തെത്തിയപ്പോൾ കനത്ത പുകയും തീയും ഉണ്ടായിരുന്നതായും, തീപിടിത്തത്തിന്റെ ഉത്ഭവം, കാരണം, സാഹചര്യം എന്നിവ കണ്ടെത്താൻ ഉന്നതതല അന്വേഷണം നടത്തുമെന്ന് ബിൽ ബോയ്സ് പറഞ്ഞു. വീടുകളിലെ സ്മോക്ക് അലാറങ്ങളും കാർബൺ മോണോക്സൈഡ് ഡിറ്റക്ടറുകളും പ്രവർത്തിക്കുന്നുണ്ടോയെന്ന് പരിശോധിക്കണമെന്നും അദ്ദേഹം താമസക്കാരെ ഓർമ്മിപ്പിച്ചു.

തീപിടിത്തത്തിൽ മരിച്ച കുടുംബാംഗങ്ങളുടെ സ്മരണയ്ക്കായി തിങ്കളാഴ്ച നഗരത്തിലെ പതാക പകുതി താഴ്ത്തിക്കെട്ടുമെന്ന് ബ്രാംപ്ടൺ സിറ്റി മേയർ അറിയിച്ചു. ഒന്റാറിയോ പ്രീമിയർ ഡഗ് ഫോർഡ് അനുശോചനം രേഖപ്പെടുത്തി.