ലിജോ മാജിക്കിൽ അഴിഞ്ഞാടി മമ്മൂട്ടി; പ്രേക്ഷക പ്രതികരണം... - Malayale.ca

https://chat.whatsapp.com/FDyHrouQqfAC7xTtsrkFWp

മമ്മൂട്ടിയെ കേന്ദ്രകഥാപാത്രമാക്കി ലിജോ ജോസ് പെല്ലിശ്ശേരി സംവിധാനം ചെയ്ത ചിത്രം ‘നൻപകൽ നേരത്ത് മയക്കം’ കാനഡയിൽ പ്രദർശനം ആരംഭിച്ചിരിക്കുകയാണ്. ആദ്യ ദിനം പിന്നിടുമ്പോൾ സിനിമയ്ക്ക് മികച്ച പ്രതികരണമാണ് ലഭിക്കുന്നത്. പ്രഖ്യാപന സമയം മുതൽ മലയാളി സിനിമ പ്രേമികൾ ആകാംക്ഷയോടെ കാത്തിരുന്ന ചിത്രമാണ് ‘നൻപകൽ നേരത്ത് മയക്കം’. മമ്മൂട്ടിക്കമ്പനി എന്ന തൻറെ പുതിയ നിർമ്മാണ കമ്പനിയുടെ ബാനറിൽ മമ്മൂട്ടി ആദ്യമായി നിർമ്മിച്ച ചിത്രം എന്ന പ്രത്യേകതയും ഉണ്ട്. എല്ലാ തരത്തിലുള്ള പ്രേക്ഷകരേയും തൃപ്തിപ്പെടുത്തുന്ന സിനിമാ അനുഭവം തന്നെയാണ് പ്രേക്ഷകന് സമ്മാനിക്കുന്നത്.

ടു കേരള എന്റർടൈൻമെന്റ് ബാനറിൽ ബിജു തയ്യിൽച്ചിറയാണ് ചിത്രം കാനഡയിൽ പ്രദർശനത്തിനെത്തിച്ചിരിക്കുന്നത്. കാനഡയിൽ വൈഡ് റിലീസായി വന്ന ചിത്രം ഹൗസ് ഫുൾ ഷോയുമായി പ്രദർശനം തുടരുകയാണ്.

പതിവ് തെറ്റിക്കാതെ വ്യത്യസ്‍തമായ ഒരു കഥയെ അതിമനോഹരമായി എൽജെപി സ്‌ക്രീനിൽ അവതരിപ്പിച്ചു എന്നുവേണം പറയാൻ. ജെയിംസിൽ നിന്ന് സുന്ദരത്തിലേക്കുള്ള അനായാസമായിയുള്ള മമ്മൂട്ടിയുടെ യാത്രയാണ് ‘നൻപകൽ നേരത്ത് മയക്കം’. ഒരുവേളാങ്കണ്ണി യാത്ര നടത്തി മടങ്ങുകയാണ് ജെയിംസും സംഘവും വഴിമധ്യെ വാഹനം നിർത്താൻ ഡ്രൈവറോട് ആവശ്യപ്പെടുന്ന ജെയിംസ് ഒരു സമീപഗ്രാമത്തിലേക്ക് അവിടം അത്യന്തം പരിചയമുള്ള ഒരാളെപ്പോലെ കയറിച്ചെല്ലുന്നതും തുടർന്ന് നടക്കുന്ന സംഭവവികാസങ്ങളുമാണ് എൽജെപി ‘നൻപകൽ നേരത്ത് മയക്കം’ ത്തിൽ അവതരിപ്പിച്ചിരിക്കുന്നത്. അഭിനയത്തിലേക്ക് കടന്നാൽ മമ്മൂട്ടിയും, അശോകനും സിനിമയിലെ മറ്റ് താരങ്ങളും അവരവരുടെ വേഷങ്ങൾ ഗംഭീരമാക്കി. തേനി ഈശ്വറിന്റെ സിനിമാറ്റോഗ്രാഫിക്കും കൊടുക്കണം എഴുന്നേറ്റ് നിന്നൊരു വലിയ കയ്യടി.

എല്ലാത്തരം പ്രേക്ഷകർക്കും തിയേറ്ററിൽ ആസ്വദിക്കാൻ പറ്റുന്ന പുതുമയുള്ള ചലച്ചിത്രാനുഭവമാണ് പ്രേക്ഷകന് സമ്മാനിക്കുന്നത്. 27-ാമത് കേരള രാജ്യാന്തര ചലച്ചിത്ര മേളയിൽ (ഐ.എഫ്.എഫ്.കെ.) പ്രദർശിപ്പിച്ച ‘നൻപകൽ നേരത്ത് മയക്കം’ പ്രേക്ഷകരുടെ പ്രിയങ്കരമായ ചിത്രമായി മാറുകയും ചെയ്തിരുന്നു.

എൽജെപിയുടെ കഥയ്ക്ക് എസ് ഹരീഷാണ് തിരക്കഥയും സംഭാഷണവും രചിച്ചിരിക്കുന്നത്. രമ്യാ പാണ്ട്യൻ, അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, അശ്വന്ത് അശോക് കുമാർ, രാജേഷ് ശർമ്മ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. മമ്മൂട്ടിക്കമ്പനി ഫിലിംസ് പ്രൈവറ്റ് ലിമിറ്റഡും ആമേൻ മൂവി മൊണാസ്ട്രിയും ചേർന്നാണ് നിർമാണം. തേനി ഈശ്വറാണ് ചിത്രത്തിന്റെ ഛായാഗ്രഹണം.