മമ്മൂട്ടി- എൽജെപി ചിത്രം ‘നൻപകൽ നേരത്ത് മയക്കം’ കാനഡയിൽ റിലീസിന്

https://chat.whatsapp.com/FDyHrouQqfAC7xTtsrkFWp

മലയാളി സിനിമാ പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന മെഗാ സ്റ്റാർ മമ്മൂട്ടിയെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്ത ചിത്രം നൻപകൽ നേരത്ത് മയക്കം ജനുവരി പത്തൊൻപതിന് കാനഡയിൽ റിലീസ് ചെയ്യും. തമിഴ് ഗ്രാമീണ പശ്ചാത്തലത്തിൽ ഒരുക്കിയിരിക്കുന്ന ചിത്രം കാനഡയിൽ ടു കേരള എന്റർടൈൻമെന്റ് ബാനറിൽ ബിജു തയ്യിൽച്ചിറയാണ് പ്രദർശനത്തിനെത്തിക്കുന്നത്.

യോർക്ക് സിനിമാസ് റിച്ച്മൗണ്ട് ഹിൽ, സെൻട്രൽ പാർക്കവേ മിസ്സിസാഗ, വുഡ്‌സൈഡ് സിനിമാസ്, ആൽബിയോൻ സിനിമാസ്, തുടങ്ങി വൈഡ് റിലീസായിട്ടാണ് കാനഡയിൽ ചിത്രം പ്രദർശനത്തിനെത്തുന്നത്. ചിത്രത്തിന്റെ പ്രീബുക്കിങ്‌ വരും ദിവസങ്ങളിൽ ആരംഭിക്കും.

എല്ലാത്തരം പ്രേക്ഷകർക്കും തിയേറ്ററിൽ ആസ്വദിക്കാൻ പറ്റുന്ന പുതുമയുള്ള ചലച്ചിത്രാനുഭവമാണ് എൽജെപിയുടെ ‘നൻപകൽ നേരത്ത് മയക്കം’ പ്രേക്ഷകന് സമ്മാനിക്കുകയെന്നത് തീർച്ചയാണ്. 27-ാമത് കേരള രാജ്യാന്തര ചലച്ചിത്ര മേളയിൽ (ഐ.എഫ്.എഫ്.കെ.) പ്രദർശിപ്പിച്ച ‘നൻപകൽ നേരത്ത് മയക്കം’ പ്രേക്ഷകരുടെ പ്രിയങ്കരമായ ചിത്രമായി മാറുകയും ചെയ്തിരുന്നു. വ്യത്യസ്ത തലത്തിലുള്ള അവതരണവും കഥാപാത്ര സൃഷ്ടിയുമാണ് ചിത്രത്തിന്റെ പ്രത്യേകത.

എൽജെപിയുടെ കഥയ്ക്ക് എസ് ഹരീഷാണ് തിരക്കഥയും സംഭാഷണവും രചിച്ചിരിക്കുന്നത്. രമ്യാ പാണ്ട്യൻ, അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, അശ്വന്ത് അശോക് കുമാർ, രാജേഷ് ശർമ്മ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. മമ്മൂട്ടിക്കമ്പനി ഫിലിംസ് പ്രൈവറ്റ് ലിമിറ്റഡും ആമേൻ മൂവി മൊണാസ്ട്രിയും ചേർന്നാണ് നിർമാണം. തേനി ഈശ്വറാണ് ചിത്രത്തിന്റെ ഛായാഗ്രഹണം.