കാനഡയിൽ ‘ജന ഗണ മന’ ഏപ്രിൽ 28ന് റിലീസ് ചെയ്യും

https://chat.whatsapp.com/IohETtskZ8IHQxOy5Wdjqa

പൃഥ്വിരാജും സുരാജ് വെഞ്ഞാറമ്മൂടും പ്രധാന വേഷത്തിലെത്തുന്ന ‘ജനഗണമന’ കാനഡയിൽ ഏപ്രിൽ 28ന് റിലീസ് ചെയ്യും. അച്ചായൻസ് ഫിലിം ഹൗസ് ഡിസ്ട്രിബ്യൂട്ടേഴ്സിൻ്റെ ബാനറിലാണ് ‘ജന ഗണ മന’ പ്രദർശനത്തിനെത്തിക്കുന്നത്.

കാൽഗരി, ടോറോന്റോ, കിച്ചനെർ, ഒട്ടാവ, ഹാലിഫാക്സ് തുടങ്ങി കാനഡയിൽ വൈഡ് റിലീസ് തന്നെയാണ് അച്ചായൻസ് ഫിലിം ഹൗസ് ഡിസ്ട്രിബ്യൂട്ടേഴ്സ് നടത്തിയിരിക്കുന്നത്. രണ്ടു വർഷത്തിന് ശേഷമാണ് ഒരു പ്രിഥ്വിരാജ് ചിത്രം തിയറ്ററിൽ എത്തുന്നത്. ജനഗണമനയുടെ റിലീസിനായി ആകാംഷയോടെ കാത്തിരിക്കുകയാണ് കാനഡയിലെ മലയാളി പ്രേക്ഷകർ. പ്രേക്ഷകരിൽ നിന്നും മികച്ച പ്രീ-ബുക്കിംഗ് പ്രതികരണമാണ് കാനഡയിൽ ലഭിച്ചിരിക്കുന്നതെന്ന് അച്ചായൻസ് ഫിലിം ഹൗസ് ഡിസ്ട്രിബ്യൂട്ടേഴ്സിൻ്റെ അണിയറപ്രവർത്തകർ പറഞ്ഞു. ജനഗണമനയിൽ ഏറെ ശ്രദ്ധിക്കപ്പെട്ട ഒന്നായിരുന്നു ചിത്രത്തിന്റെ ട്രെയിലർ. നാല് മിനുട്ട് നീണ്ടുനില്ക്കുന്ന ഒരു സീനായിരുന്നു ട്രെയിലറായി അണിയറപ്രവർത്തകർ പുറത്തുവിട്ടത്.

‘ക്വീൻ’ എന്ന സിനിമയ്ക്ക് ശേഷം ഡിജോ ജോസ് ആന്റണി ഒരുക്കുന്ന ചിത്രമാണ് ‘ജന ഗണ മന’. ഷാരിസ് മുഹമ്മദാണ് ചിത്രത്തിനായി തിരക്കഥ ഒരുക്കിയിരിക്കുന്നത്. പൃഥ്വിരാജ് പ്രൊഡക്ഷൻസിന്റെയും മാജിക്ക് ഫ്രെയിംസിന്റെയും ബാനറിൽ സുപ്രിയ പൃഥ്വിരാജ്, ലിസ്റ്റിൻ സ്റ്റീഫൻ എന്നിവർ ചേർന്നാണ് ‘ജന ഗണ മന’ നിർമ്മിക്കുന്നത്. മംമ്ത മോഹൻദാസാണ് ചിത്രത്തിലെ നായിക. ധ്രുവൻ, വിൻസി അലോഷ്യസ്, ശാരി എന്നിവരാണ് ‘ജന ഗണ മന’ യിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.