കാനഡയിൽ ചരിത്രം സൃഷ്ട്ടിക്കുവാൻ മമ്മൂട്ടിയുടെ 'ഭീഷ്മപർവം'; മെഗാ ഫാൻസ്‌ ഷോകൾ സംഘടിപ്പിച്ച് ആരാധകർ - Malayale.ca

https://chat.whatsapp.com/JAhWwGm5OuJC1YQunRhk80

മമ്മൂട്ടി നായകനായ ‘ഭീഷ്മപർവം’ കാനഡയിൽ മാർച്ച് മൂന്നിന് റിലീസ് ചെയ്യും. ടൂ കേരള എന്റർടൈൻമെന്റ് ബാനറിൽ ബിജു തയ്യിൽച്ചിറയാണ് ചിത്രം കാനഡയിൽ പ്രദർശനത്തിനെത്തിക്കുന്നത്. മാർച്ച് 2-ന് രാത്രി (9.50 PM) റിച്ച്മൗണ്ട് ഹിൽ യോർക്ക് സിനിമാസിലാണ് മമ്മൂട്ടി ഫാൻസ്‌ അസോസിയേഷൻ കാനഡയുടെ നേതൃത്വത്തിൽ മെഗാ ഫാൻസ്‌ ഷോയും സംഘടിപ്പിച്ചിട്ടുണ്ട്.

ബിഗ് ബി പുറത്തിറങ്ങി 15 വർഷങ്ങൾക്കു ശേഷം മമ്മൂട്ടിയെ നായകനാക്കി അമൽ നീരദ് സംവിധാനം ചെയ്യുന്ന ചിത്രവുംകൂടിയാണ് ‘ഭീഷ്മപർവം’. അമൽ നീരദുമായി മമ്മൂട്ടി കൈ കോർക്കുമ്പോൾ വലിയ പ്രതീക്ഷയാണ് മലയാളി ആരാധകർക്കുള്ളത്. മമ്മൂട്ടിയൂടെ മുടിനീട്ടി വളർത്തിയ ലുക്ക് ആരാധകർക്കിടയിൽ വലിയ ചർച്ചയായിരുന്നു. ഗ്യാങ്സ്റ്റർ, ഡ്രാമ വിഭാഗത്തിൽ പെടുന്ന ചിത്രവുംകൂടിയാണ് ‘ഭീഷ്മപർവം’. മൈക്കിൾ എന്ന കഥാപാത്രത്തെയാണ് ചിത്രത്തിൽ മമ്മൂട്ടി അവതരിപ്പിക്കുന്നത്. ചിത്രത്തിന്റെ ട്രെയിലർ ഇരുകൈയും നീട്ടിയാണ് ആരാധകർ വരവേറ്റത്. മമ്മൂട്ടിയുടെ മാസ് ഡയലോഗുകളാണ് ട്രെയ്ലറിന്റെ മുഖ്യ ആകർഷണം.

നെടുമുടി വേണു, കെപിഎസി ലളിത, നാദിയ മൊയ്തു, ലെന, സൗബിൻ ഷാഹിർ, ഷൈൻ ടോം ചാക്കോ, ശ്രീനാഥ് ഭാസി, ഫർഹാൻ ഫാസിൽ, ദിലീഷ് പോത്തൻ, ജിനു ജോസഫ്, ശ്രിന്ദ, വീണ നന്ദകുമാർ, അനസൂയ ഭരദ്വാജ്, അനഘ, മാല പാർവതി, കോട്ടയം രമേശ് തുടങ്ങി വൻ താരനിരയാണു ചിത്രത്തിൽ അഭിനയിക്കുന്നത്. അമൽ നീരദും, ദേവദത്ത് ഷാജിയും ചേർന്നാണ് ചിത്രത്തിന്റെ രചന നിർവ്വഹിച്ചിരിക്കുന്നത്. റഫീഖ് അഹമ്മദ്, വിനായക് ശശികുമാർ എന്നിവരുടെ വരികൾക്ക് സുഷിന് ശ്യാം ആണ് സംഗീതം നൽകിയിരിക്കുന്നത്.