ദക്ഷിണാഫ്രിക്കയിൽ നിന്നും അയൽ രാജ്യങ്ങളിൽ നിന്നുമുള്ള വിമാനങ്ങൾക്ക് യാത്രാ വിലക്ക് ഏർപ്പെടുത്തി കാനഡ

Join for daily Canada Malayalam News

https://chat.whatsapp.com/CxfbgpDHKJq6JQLeNYUIL0

ദക്ഷിണാഫ്രിക്കയിൽ നിന്നും അയൽ രാജ്യങ്ങളിൽ നിന്നുമുള്ള വിമാനങ്ങൾക്ക് കാനഡ യാത്രാ വിലക്ക് ഏർപ്പെടുത്തി. പുതിയ കോവിഡ്-19 വേരിയന്റ് ഒമൈക്രോൺ കണ്ടെത്തിയതിനെ തുടർന്ന് നിരവധി ദക്ഷിണാഫ്രിക്കൻ രാജ്യങ്ങളിൽ നിന്നും യാത്രാ നിരോധനം ഏർപ്പെടുത്തിയിരിക്കുകയാണ് ഫെഡറൽ ഗവൺമെന്റ്.

പുതിയ വേരിയന്റിന്റെ വ്യാപനം പരിമിതപ്പെടുത്തുന്നതിനുള്ള ശ്രമത്തിൽ സർക്കാർ അഞ്ച് നടപടികൾ ഏർപ്പെടുത്തുമെന്ന് ആരോഗ്യമന്ത്രി ജീൻ-യെവ്സ് ഡുക്ലോസ് പ്രഖ്യാപിച്ചു. കഴിഞ്ഞ 14 ദിവസത്തിനുള്ളിൽ ദക്ഷിണാഫ്രിക്കയിലൂടെ യാത്ര ചെയ്ത വിദേശ പൗരന്മാരെ രാജ്യത്തേക്ക് അനുവദിക്കില്ലെന്നും പറഞ്ഞു. ദക്ഷിണാഫ്രിക്ക, മൊസാംബിക്, നമീബിയ, സിംബാബ്‌വെ, ബോട്‌സ്വാന, ലെസോത്തോ, ഈസ്വാതിനി എന്നീ രാജ്യങ്ങൾക്കാണ് യാത്രാ നിരോധനം ഉള്ളത്. കഴിഞ്ഞ 14 ദിവസത്തിനുള്ളിൽ കാനഡയിലെത്തിയ എല്ലാവരും കോവിഡ് പരിശോധനയ്ക്ക് വിധേയരാകണം. പരിശോധനാ ഫലം നെഗറ്റീവാകുന്നതുവരെ ഇവർ ഐസൊലേഷനിൽ കഴിയേണ്ടിവരും എന്നും ആരോഗ്യമന്ത്രി പറഞ്ഞു.

കനേഡിയൻ പൗരന്മാരും ആ രാജ്യങ്ങളിൽ നിന്നുള്ള സ്ഥിര താമസക്കാരും മടങ്ങിവരുന്നതിന് മുമ്പ് ഒരു കോവിഡ് -19 ടെസ്റ്റ് നടത്തണം, കൂടാതെ നെഗറ്റീവ് ഫലം ലഭിക്കുന്നതുവരെ ഒരു ഹോട്ടലിൽ ക്വാറന്റൈൻ ചെയ്തിരിക്കണമെന്നും പുതിയ ഉത്തരവിൽ പറയുന്നു. ദക്ഷിണാഫ്രിക്ക നിന്നും മറ്റൊരു രാജ്യത്തിലൂടെ യാത്ര ചെയ്യുന്ന കനേഡിയൻമാർ നാട്ടിലേക്ക് വരുന്നതിന് മുമ്പ് കോവിഡ് -19 ടെസ്റ്റ് നടത്തണം കൂടാതെ ഹോട്ടലിൽ ക്വാറന്റൈൻ ആവശ്യമാണ്.

ഒമൈക്രോൺ എന്ന് വിളിക്കപ്പെടുന്ന പുതിയ വേരിയന്റിനെ വെള്ളിയാഴ്ച ലോകാരോഗ്യ സംഘടന ‘ആശങ്കയുടെ വകഭേദം’ എന്ന് വിശേഷിപ്പിച്ചു. അതിവേഗ രോഗപകർച്ചയ്ക്ക് ശേഷിയുള്ളതാണ് പുതിയ വൈറസ് വകഭേദമെന്നാണ് വിലയിരുത്തൽ. ഗ്രേറ്റ് ബ്രിട്ടൻ, ഇന്ത്യ, ജപ്പാൻ, ഇസ്രായേൽ, യൂറോപ്യൻ യൂണിയൻ എന്നീ രാജ്യങ്ങൾ യാത്രാ നിരോധനം ഏർപ്പെടുത്തിയവരിൽ ഉൾപ്പെടുന്നു. B.1.1.529 എന്നും അറിയപ്പെടുന്ന ഈ വകഭേദം ഇതുവരെ ദക്ഷിണാഫ്രിക്കയിലും ബോട്സ്വാനയിലും ഇസ്രായേൽ, ബെൽജിയം, ഹോങ്കോംഗ് എന്നിവിടങ്ങളിലും കണ്ടെത്തിയിട്ടുണ്ട്.